三和故事

三和小故事 本校第四任校長邱玉玲校長撰稿

過年時,阿益的爸爸媽媽chhoa著伊和妹妹到瑪家鄉的涼山水chhiang、台灣原住民文化園區chhit tho,路過內埔鄉。 阿益:啊!三和,和咱學校的名完全共款呢!遮敢有國小? 爸爸:哦,三和國小,咱屏東縣只有一間,但佇別縣市號名三和國小是未少,比如雲林縣、台中縣、桃園縣、嘉義縣、台北縣、台東縣攏有三和國小,可見即個名真好。 妹妹:我來數看咱里港鄉有幾間學校,有里港國中、里港國小、載興國小、土庫國小、信國國小、塔樓國小、玉田國小和咱三和國小總共八間,喔,對了!in是按怎號名字啊? 媽媽:學校號名有一寡方法,有的會以鄉鎮名來號學校名,像里港國小kah里港國中佇里港鄉中心地點,就號名「里港」兩字;有的會以村里來號名,像玉田國小佇玉田村內、塔樓國小佇塔樓村內;有的是以路名來號名,像載興國小佇載興路上、信國國小佇信國路上;有的為著紀念某一人來號校名,像屏東市鶴聲國小就是為了紀念林鶴聲烈士而號名,但是三和國小校名是怎樣來阮就毋知。 阿益:爸爸,阮學校佇土庫村土庫路上,為什麼毋叫土庫國小?現此時,土庫國小,遐阿無咱土庫囝仔te讀冊啊?真是奇怪! 爸爸:唉,這一講起來話頭長,其實這兩間學校名字會顛倒反,是有原因。 阿益和妹妹:緊講,緊講,人想欲聽! 爸爸:土庫國小和三和國小上早時是共一家伙啊,佇民國十一年(1922)四月,咱溪北地區才有學校就是咱chin講的國小,位置是佇現在里港鄉農會土庫分會倉庫的所在,名號「里港公學校土庫分教場」,當時溪北四莊的囝仔就到遮讀冊,到了民國二十七年(1938)四月一日獨立,號名叫「土庫公學校」,到了民國三十四年(1945)十月二十五日台灣光復以後,因為遇到颱風和大水,教室攏被風颱颱了了,大水沖沖去,加上日本戰敗後轉去日本,所以就接收了日本人特別為in 日本囝仔佇千歲村(現在的中和村)所設的千歲小學,並且將它改名「里港鄉第二國民學校」,到了民國三十六年(1947)五月又改名為「土庫國民學校」,到了民國三十九年(1950)十月一日因為行政區域重新調整,原來高雄縣劃分為高雄縣和屏東縣兩縣,里港鄉屬於屏東縣,所以學校又改名為「屏東縣里港鄉土庫國民學校」,到了民國四十七年(1958)九月時,土庫村民要求佇土庫村原來的所在,就是里港鄉農會土庫分會倉庫遐起教室,互附近囝仔就近讀冊,就增設分校;因為台灣光復時行政區域屬於里港鄉二重溪溪北的土庫、三廓、瀰力三村,為了使三村村民和睦相處,所以有「三和」名稱,佇遮治安單位派出所就叫「三和派出所」,分校設立就綴派出所名叫「土庫國民學校三和分校」,互一、二年級囝仔佇遮讀冊,年紀大囝仔亦是到本校讀冊,後來讀冊囝仔一直增加,教室不夠用,當時村長莊文對先生就和地方人士成立「土庫國民學校三和分校籌備委員會」,向台糖公司買地起教室,當時村民們攏熱烈響應,有錢出錢,有力出力,佇現在阮學校所在起教室,但是當時亦是叫「三和分校」,一直到民國六十七年(1978)八月一日才正式獨立,校名叫做「屏東縣里港鄉三和國民小學」,獨立時全莊人攏真歡喜。 阿益:那按呢咱學校的名是按怎毋甲改轉來叫做土庫國小? 爸爸:根據老一輩講法,當時兩個所在地方士紳也想欲將名字轉換來,不過當時行文去教育廳,教育廳無同意,理由是學校名已經號啊,哪有換來換去的道理,講代誌有前有後,所以才會發生佇土庫村的國小無叫土庫國小,而返到轉土庫國小卻無迄佇土庫莊的奇怪代誌,一般人攏嘛撒無寮仔門呢。 妹妹和阿益恍然大悟:喔!原來如此,三和國小校名是有歷史故事的喔!以後人若問我學校名是按怎來的,我就會當清清楚楚講互伊知啊!  

參考資料 蘇坤漢、盧繼寶(1994)。里港鄉鄉土教材。 陳秋坤、吳庚元(2003)。本鄉國民教育現況。里港鄉誌,頁710-712。 莊文能先生口述。里港鄉土庫村耆老。

瀏覽數: